阿煒維園式議論政局時事專欄,少不免都要搵啲野鬧L爆佢。今日原來有個選舉論壇,見到眼火爆。
驚唔係個個知呢段時間點解無端端有選舉論壇,我解釋一下先,再講有咩咁眼火爆。長話短說呢,3月11日要補選3個立法會直選議席,民主派呢就想協調揀一個最受歡迎既候選人出來,增加贏面,就搞左個初選,所以有左今日個選舉論壇勒。 我好想知D候選人究竟支唔支持同志,論壇入面真係有問到佢地是否支持性傾向歧視立法喎!姚松炎第一個答,佢反對所有歧視。唔...都okay啦,姚生應該係似心態上支持既,但就唔太熟議題答唔到太長。第二個答係民主黨袁海文,估唔到隻乳鴿都答得有紋有路,又話同平機會傾過,又話要支持立法,仲話唔立法就好多野都做唔到咁。 好啦,頭兩個都覺得收貨既,眼火爆重頭戲就係第三個答既馮檢基啦。呢期馮檢基突然重新受到好多同志關注,因為佢先前出左篇向同志道歉文,因為廿幾年前佢一票反對就過唔到既性傾向歧視立法。嘩佢咁炒花生,梗係睇實佢答咩啦,點知佢一開口就話自己支持「一男一女」既婚姻。頂!我以為聽緊黃偉明講野,呢個時候條Facebook live既嬲就飛晒出來。然後佢再弱弱地補一句大約意思係同性婚姻以外咩都可以傾。一時間真係成頭都係火,佢騎牆食兩邊想食到幾時呢作為咁資深政治人係咪可以調下兩句野既次序講都無咁令人反感呢咁佢高調出來道歉係想多D同志支持佢定多D同志記得要嬲佢呢!唉D火都多到唔知邊樣爆先。 今次初選呢,都有位俾市民表態既,到時大家識點做啦! 傳送門: 民主派初選選舉論壇:https://www.facebook.com/PowerForDemocracy/videos/1637652916293297/ 民主派初選搞咩:https://www.facebook.com/PowerForDemocracy/posts/1633141760077746 補選咩野:http://www.news.gov.hk/tc/categories/admin/html/2017/12/20171201_115137.lin.shtml 馮檢基向同志道歉文事件:https://www.inmediahk.net/node/1053615 =============================== 【les corner 女角平權協作組】 www.lescorner.org IG:les_corner #lescorner #女角
0 評論
發表回覆。 |
|